وجود, عدم, ضربه في الخصيه اليسري

البوست المره دي هيكون تفكير فلسفي من الطراز الرفيع

الساعه دلوقتي 1:11 صباحا, منسدح علي الكنبه, بطني فيه شعور الشبع الجميل خصوصا بعد ما بلعت 2 اندومي فراخ.

حاسس ان ريحه بوقي مش احسن حاجه ودا مخليني مش مرتاح وانا بتخيل نفسي في وضع رومانسي مخل بالاداب مع ال partner فا مضطر اني اقفل التخيل السامي دا باني اسمع حاجه زي

The machine - Reed wonder, Aurora Olivas

link

عارف انت مبدأ “رش ملح علي الجرح, عشان انت انسان واطي لازم تتألم؟” …بالظبط !

عامه,

كنت بفكر من كام يوم في موضوع اتكلم فيه غيري وهبد فيه ناس كتير من علماء, وجهلاء, ورجال اعمال, وعاطلين عن العمل,

“هل فعلا في اله؟”

عامه السؤال دا بيضعنا قدام بكابورت اجابات كتير تسبقها اسئله اكبر واعمق تنسف الاجابات الاولي وتعمل باكابورت اسئله عملاق بيغطي علي بكابورت الاجابات الاخري دي ونفضل في هذه الدوامه الي ان يقرر شخص فينا انه يقفل الموضوع ويرجع لنقطه الصفر زي ما بيحصل دايما.

لكن انا شخصيا مش شغالني اجاوب علي السؤال دا قد ما فارق معايا اني اعرف حاجه زي:

• احنا مين اصلا وايه اصلنا.

لو انت مستغرب وهتقولي طب ما السؤالين هم وجهين لعمله واحده, ومعاك حق في هذا الاستنكار من موقفي التحنيكي المضاد للتيار اللي بيعكس محاول يائسه مني في اني ابقي جامد فكريا.

بس بصراحه انا حاسس انه مختلف مش هكدب عليك,

عشان اوضح انا اقصد ايه

من كان اسبوع انا كنت بلعب EVE online, المفروض هي لعبه اقتصاد مفتوح عباره عن انك تبقي في الفضاء وتجمع موارد من النيازك وتبني تحالفات سياسيه مع لاعبين اخرين او سلاسل امداد من الموارد دي, المهم انه لعبه مهندسين ومرضي نفسين

لكن هي خلتني اخد بالي من حاجه, ايه يمنع فعلا وجود حضاره عندها مركبات تخليها تعدن موارد من النيازك فا سألت صديقي الوحيد Gemini عن ايه يمنع حاجه زي كدا, قالي التكلفه والتكنولوجيا المتأخره لسه شويه, المهم لقيته قالي لو دا فعلا حصل احنا هنبقي حضاره من نوع Type II, هنا بقي عقلي توقف في لحظه اورجاسم معرفي وتدفق من الذكاء خلاني اكمل واسأله يعني ايه Type II Civilization كمل وقالي ان الحضارات تم تصنيفها بناء علي كميه الطاقه المستغله, بواسطه هذا الراجل ذو الساعه ال poljot ذات الوقار.

Nikolai Kardashev - Николай Кардашёв

Nikolai Semyonovich Kardashev اللي طبعا عمل المقياس دا باسمه Kardashev scale

واللي قسم فيه الحضارات ل 3 انواع

المهم بقي انا شد انتباهي اوي حاجه وهي حضاره ال Type III لان المفروض دي الحضاره اللي عرفت توصل لقدره انها تطوع طاقات المجرات باكلمها لها فقط

بس قبل ما انت ترميني بالنعال زي ما حصل مع جورج بوش في العراق, وتقولي ايه دليلك

هقولك صدقني انا ذات نفسي معنديش دليل ولا اصحاب النظريه نفسهم عندهم دليل قاطع, معظمها تحليل للوضع.

وعشان بما انهم ناس تبع ال SETI فا انا شخصيا لاحظت انهم عندهم طريقتين في تتبع اثار الحضارات الاخري, وهم:

• انتظار رسائل من الحضارات دي عن طريق اشارات Radio
• انك تثبت وجودهم بنفسك عن طريق تتبع اثار استخدامهم للطاقه بما ان طبعا هيبقي في فقد يخليك تلاحظهم (بس بعدين الموضوع طلع صعب لدرجه انه زي محاوله سماع همسه من انثي ناعمه وسط صياح دجاج ومحللين كره قدم في زريبه في اعالي الجبال)

بالنسبه لاول طريقه دي تم ذكرها علي فكره في العنوان الرئيسي في الويكي:

• article
  • possible scenarios
    • The interstellar transmission of information

A signal of artificial origin should contain more than 10 and less than 100 bits. The latter would be of two types: transient and stable. Several criteria allow us to distinguish a signal of artificial origin from others. First, the optimal region of the spectrum to host artificial signals is the one where the temperature of the cosmic microwave background is the lowest. Second, artificial sources must have a minimum angular size. The presence of suspicious data in other regions of the spectrum (such as circular polarization, radio and optical frequencies, or X-ray emissions can confirm that it is an intelligent transmission. Two sources among those studied have parameters close to those expected: 1934-63 and 3C 273B

ودا باختصار, تخيل انك غني فشخ لدرجه ان تخصص نجم عشان يبقي وقود لعمليه ارسال رسائل للكون بتقول فيها انك موجود, تخيل ان كدا احنا بنتكلم عن type II Civilization, اظن دا سبب قوي ليه ال type III شدتني جدا.

مع ان علي فكره تم اثبات ان ال quasar بيطلع الاشرارت دي بشكل طبيعي لكن بيتم طرح سؤال

ايه اللي يثبت اصلا ان دا سلوك النجم الطبيعي اصلا ؟ ايه يمنع اصلا ان الحضارات المتقدمه دي مخليه كل نشاطتها تبقي بالنسبه لنا هي الطبيعيه

بعيدن علماء الفيزياء بيقولوا ان الاحتمال الاسهل من ناحيه التفسير هو اللي يعتبر الاصح حاليا, انا معاهم الصراحه بس برضو دا مش بيمنع اننا نسيب الباب موارب للاحتمال اللي فات

طيب هيجي سائل يقول “يا اورين انت بتتنيل تقول دا كله ليه وايه علاقه دا بالاله ووجوده”

طيب

HEAE ME OUT

فاكر لما ايلون ماسك قال فيما معناه, ان نسبه اننا عايشين في محاكاه كبيره جدا جدا ؟

اولا دا مش كلامه دا كلام موجود في Wikipedia

كانت حتي ضمن احدي فلسفات الدكتور Nick Bostrom

باسم Simulation argument

اللي بتنص ان لو اجهزه الكمبيوتر باقت متطوره بما يكفي لدرجه محاكاه الوعي بشكل ما, فا دا بيخلي عدد الحيوات اللي تم محاكتها اعلي من الحياه البيولوجيه الحقيقيه.

فا احصائيا نسبه انك فعليا في محاكاه عاليه فشخ.

فاللسبب دا انا عندي نظريه فشيخه, وهي:

“ايه يمنع فعليا اننا كلنا عباره عن بشر اتولدنا في Lazy simulation لكون احنا موجودين فيه اتعمل بواسطه Type III civilization او اعلي , عشان يضمنوا بقائهم كا سلاله كونت الحضاره دي لازم انهم يخلوا الجيل الصغير منهم يمر باختبارات محاكاه علي حياه ال Type 0 عشان يقدر حياه ال Type III او اعلي, عن طريق التخلص عن الافكار اللي زي “نحن وهم”, الاذي, الجشع, الكسل, وباقي الخطايا السبع المميته

وتكون المحاكاه دي في وقتهم حوالي ربع ساعه بتحصل لطفلهم البالغ من العمر 6 سنين, بس بتمر عليه انها 80 سنه اللي هي عمر الانسان في المتوسط, ولو الطفل في المحاكاه دي عاش فيها وهو شخص بيدوس علي الاخرين, وجشع وشرير برجوازي ابن كلب, او انتحر بيعاد عليه الاختبار تاني لحد ما يتعلم”

ودا مشابه حتي بمعظم رسائل الاديان اللي بتوصل نفس الافكار زي ان دي حياه مجرد اختبار وان في حاجه اهم بعد دا, وان الانتحار حرام, وايذاء الناس حرام برضو.

وحتي ممكن دا تفسير ليه الالكترون له طبيعيه مزودجه في تجربه الشق المزدوج لما بيتصرف كا جسيم عند المراقبه و موجه عند عدم المراقبه, مش دا يكون بسبب ان المحاكاه اللي احنا فيها هي lazy simulation يعني انها بترندر اللي موجود قدامنا واحنا شايفينه؟

وحتي لو فكرت فيها عشان تحاكي كل دا بدون ما تعمل brute force لكل ذرات الكون انت ممكن تحتاج طاقه حوالي

$10^{25}$ W

ودا يعتبر فكه بالنسبه ل type III Civilization

فا مش عارف انا هبدت هبدتي دي واستودعكم بقي,

بس بجد تخيل لو بعد كل دا بعد ما اموت, اصحي في الاخر وانا طفل في جسم نوراني, والاقي قدامي كائنه بطول 4 متر وتضاريس و زوايا خطيره في لبس ممرضه بتقولي ان انا عديت من المحاكاه وهقدر اكمل حياتي في المجتمع بتاعي وانا قدامي ابويا وامي, حرفيا اول حاجه هعملها هي اني هضرب ابويا في بضانه واقوله “يعني يوم ما تخليني اعيش في مكان صعب تخليني اعيش في مصر يا عرص؟!!”

عامه اظن ان انا كدا خليت الدنيا over شويه بس سعيد ولله اني شغلت عقلي شويه وقرأت Wikipedia وبقيت من النبلاء مش الفلاحين

عامه الساعه دلوقتي 5:21 صباحا, حاسس ببعض الالم في القفص الصدري عندي, اظن ان بسبب وضعيه النوم الغلط بتاعتي, مستاء شويه اني اخدت وقت طويل فشخ في الكتابه بس بجد قراءه وفهم حاجه من Wikipedia اصعب من الم الولاده.